Ministria e Punëve të Jashtme dhe Diasporës e Kosovës ka njoftuar se Gjykata e Lartë e Suboticës ka vendosur të zgjasë për 30 ditë të tjera masën e paraburgimit ndaj Arbnor Spahiut, i arrestuar nga autoritetet serbe më 7 qershor 2025.
Sipas Zyrës Ndërlidhëse të Kosovës në Beograd, avokati mbrojtës i Spahiut ka konfirmuar se deri më tani nuk është paraqitur asnjë provë e besueshme që do të rëndonte pozitën e tij ligjore.
Prokuroria serbe po e lidh rastin me ngjarjet në Banjskë, megjithatë, mbrojtja ka dorëzuar dokumentacion që dëshmon se Spahiu ka dalë nga Policia e Kosovës vite para rastit.
Familjarët e tij pritet të vizitojnë të enjten z. Spahiun në Suboticë, ndërsa Zyra Ndërlidhëse ka njoftuar se do të paraqesë kërkesë zyrtare për një vizitë institucionale.
