Zëvendëstrajneri i ri i Kombëtares shqiptare të futbollit, argjentinasi Zabaleta, ish-futbollist i Manchester City-t, u shpreh në konferencën për shtyp të prezantuese, këtë të hënë, se njeh pjesën më të madhe të futbollistëve shqiptarë. Ai u shpreh se shqiptarët kanë një ngjashmëri me Argjentinën, pasi e dashurojnë futbollin.
“Jam shumë i kënaqur që Argjentina na dha kënaqësi të madhe. Njoh shumicën e futbollistëve të kombëtares shqiptare. Shoh në Shqipëri atë që kanë edhe tifozët e Argjentinës. Ky vend e dashuron futbollin. Shohim shumë lojtarë të talentuar, me potencial të madh, pasi luajnë në ligat më të rëndësishme të Europës. Duhet të kemi mentalitetin e duhur.
Lojtarët e Kombëtares duhet të kenë besim te vetja e tyre, duhet të jenë të bindur që mund të kenë sukses. Shpresoj t’i frymëzojmë këto lojtarë që të bëjnë krenar veten e tyre, por edhe tifozët. Besoj se mund të kemi miksin e lojtarëve të mirë me mentalitetin e duhur”, tha Zabaleta.
Ndërkohë, Sylvinho u shpreh se i ka ndjekur kuqezinjtë në ndeshjet e fundit miqësore, ndërsa thekson që puna do të ndahet në dy pjesë.
“Dy-tri ndeshje miqësoret e fundit i kam parë. Kam punuar me Manajn kur ishte pjesë e Interit. E njihja shumë mirë kombëtaren shqiptare. Ka pasur dhe ka futbollistë teknikisht të fortë. Ne do të fillojmë punën, e cila do të ndahet në dy pjesë. Së pari, monitorimi i futbollistëve dhe më pas do të shkojmë t’i ndjekim në fushën e lojës.
Në këtë moment, kemi futbollistë teknikisht të fortë dhe në këtë pjesë kemi shumë për të bërë. Kombëtarja ka lojtarë të rëndësishëm në botën e futbollit. Keidi Bare, apo Armando Broja, që janë të dëmtuar, uroj që të kthehen sa më shpejt”, u shpreh Sylvinho.
