Gazetari Vehbi Kajtazi ka reaguar përmes një postimi në rrjete sociale ndaj mënyrës se si kryeministri në detyrë Albin Kurti iu përgjigj gazetares të Klan Kosovës, e cila gjatë një interviste pyeti për mungesën e barnave bazike në QKUK.
Në reagimin e tij, Kajtazi shkruan:
“Një kolege e Klan Kosovës i bëri një pyetje legjitime diktatorcit Albin Kurti rreth mungesave të barnave. Pyetja ishte: ‘A konsideroni se është transformuar shëndetësia kur çdo ditë raportojmë për ilaçe bazike që mungojnë në QKUK. Nuk ka teste të alergjisë, nuk ka albumina – sektori privat abuzon me të dhe shumë të tjera.’”
Më tej, ai përshkruan përgjigjen e Kurtit:
“Diktatorci Kurti iu përgjigj me pyetje retorike: ‘Për transformim në shëndetësi nuk ka dilemë. I kemi prezantuar rezultatet 4-vjeçare, e për to përgjigjet ministri. Ndërkaq znj. gazetare, ju i thoni pronarit tuaj, pronarit të televizionit tuaj që t’ia kthejë 62.6 milionë euro Telekomit të Kosovës. Leji albuminat. 62.6 milionë euro duhet t’ia kthejë Korporata Devolli Telekomit të Kosovës, pastaj flisni për albuminat.’”
Kajtazi përmend edhe kohën kur Kurti ka huazuar para nga Devolli.
“Ky njeri që është uzurpator i pozitës së kryeministrit, personalisht ka marrë para nga vëllezërit Devolli. Me para të tyre e ka botuar një libër. Me para të tyre e ka financuar një fushatë ‘Duaje të tenden’, ndërkohë që importi nga Serbia është më i madh se kurrë. Është prishur me ta kur ata kanë refuzuar t’i paguajnë haraç.”
Ai gjithashtu përmend emrin e Martin Berishajt dhe ngrit pyetje për punësimin e bashkëshortes së Kurtit:
“Kurti ka marrë para nga Martin Berishaj, i cili miliona euro i ka marrë nga Beogradi. Kurti duhet të na tregojë sot se ku i punon gruaja dhe cili është roli i saj në kompaninë shtetërore serbe, Elektroprivreda Serbia.”
Në fund, Kajtazi përmend edhe ministrin e Shëndetësisë, Arben Vitia:
“Ministri Arben Vitia nga pozita e ministrit ka shkuar drejtor i spitalit Olive dhe nga pozita e drejtorit të spitalit Olive është kthyer ministër.”
