Në hulumtimin e “Betimit për Drejtësi”, mbi dyshimet për veprimtari të kundërligjshme të kursit të gjuhës gjermane “Edi” në Skenderaj, vijimi i kursit bëhet tre ditë pasi që kandidati fillon mësimin, ku pastaj të dy palët dakordohen se a do të vazhdojë tutje.
Abedin Shatraj nga ky kurs thotë se, sapo dikush të fillojë angazhimin në kursin e tij, kalimi i testit është i garantuar.
Sipas tij, ata disponojnë shabllone, shënime dhe materiale të sakta që përputhen me pyetjet e provimit, duke u siguruar që kursantët të mësojnë vetëm ato që do t’u kërkohen në test.
Ai thekson se këto pyetje paraqiten edhe në Ambasadë, prandaj është e domosdoshme që pjesëmarrësit t’i mësojnë.
Gjithashtu, Shatraj shpjegon se kursi përfshin një periudhë prove prej tre ditësh, gjatë së cilës kursanti ka mundësinë të vendosë nëse dëshiron të vazhdojë apo jo.
Ai shton se në këtë periudhë prove edhe ai vetë vlerëson nëse mund ta ndihmojë kursantin për të kaluar testin. Nëse vëren se nuk ka mundësi t’i sigurojë suksesin, ai nuk e pranon atë në kurs.
Për më tepër, Shatraj deklaron se është i sigurt në efektivitetin e metodës së tij dhe garanton suksesin e pjesëmarrësve.
“Kur të hijna me kry gjithqysh punën, nëse unë s’ta kry punën gjithqysh as këtë kafe 50 cent nuk e marrë, tash ka dikush që punon, dikush që s’punon. Me ditë unë që nuk muj me të kry pse me të mbajtë në klasë me (nuk kuptohet), një muaj ditë kur nuk ka kurgjë as prej meje as prej teje. Kështu që, me një aspekt të nali puna kryhet pa problem”, thotë Shatraj në bisedë me ekipin e “Betimit për Drejtësi”.
Shatraj, që bashkë me familjarë kanë kursin “Edi” në Skenderaj, tregon se si grupe të caktuara të kandidatëve i dërgon për testim edhe në Institutin Gëte (Goethe) në Serbi.
Abedin Shatraj: Mujna edhe në Beograd, mujna edhe në Prishtinë po i kapërcejmë shumë lehtë edhe në Prishtinë. Po qysh jo, bash dje i pata, dje i pata nxënësit atje në 12 të natës kanë ardhë mirë, të njëjtin grup e kom pasë edhe në Prishtinë vallai super kanë ec, veç kqyre kur po hjeket gramatika po shkojna veç me kopje çka bjen në provim nuk po e kem problem, edhe qekjo që e ka kalu dje në Prishtinë 56 vjet i ka, 72 poena i ka marrë. Veç që në Prishtinë dje janë dalë rezultatet deri më 20 nëntor diplomat nuk i japin na i vonojnë shumë e në Beograd i marrim brenda dhjetë ditëve me rezultate, me diploma, me krejt, veç që është një rrugë goxha e gjatë e mundimshme.
BpD: Ka shpenzime edhe ajo?
Abedin Shatraj: Jo jo, kah të ju çoj unë qeky çmim sa është me 1500, për anej shpenzimet janë të mijat, veç në Prishtinë, në Prishtinë e dijnë tanë Gete Institutin s’kam çka hjeki shpenzime. Andej shpenzimet janë të mijat me rrugë, me krejt, 1600 euro e paguaj autobusin special, jo autobus palidhje 2020 është i Prizrenit, qetu para klase mi merr e para klase mi bjen. Gruaja është me juve bashke me gjithë djalë.
Për më shumë, ndiqeni hulumtimin “Pa mbikëqyrje, me ryshfet: Skema e kurseve të gjuhës gjermane”, i cili transmetohet në Betimi për Drejtësi, KTV dhe TVArta/BetimipërDrejtësi
