Kalimi i testit të shoferit mund të jetë mjaft stresues, dhe çmimet dhe vështirësia e testit ndryshojnë nga vendi në vend. Portali “Zutobi” ka bërë kërkime dhe ka publikuar listën e vendeve në të cilat është më e vështira dhe më e lehta për të kaluar testin e shoferit.
Vendi me testin më të lehtë të vozitjes në botë është India. Që kandidatët të marrin patentë shoferin, mjafton të drejtojnë drejt e të kthehen.
“Gjatë provimit të vozitjes në Indi, kandidatëve u duhet vetëm të vozisin drejt, të kthehen majtas dhe të ndalojnë pas 45 metrash për të kaluar”, shpjegon Zutobi. Pra, testi është shumë i thjeshtë dhe shkalla e kalueshmërisë është jashtëzakonisht e lartë. Por me më shumë se 10 milionë leje drejtimi të lëshuara në Indi çdo vit, marrja e testit në vendin më të populluar në botë ndjek rregulla të veçanta.
Përkatësisht, India ka rrugët më vdekjeprurëse në botë. Në vitin 2011, pothuajse 74 milionë automjete u vëzhguan në rrugë dhe 196,000 njerëz vdesin në trafik çdo vit.
Për shkak të trafikut të rënduar dhe rrezikshmërisë së rrugëve, kandidatët i nënshtrohen testeve të vozitjes në pista private ose në parkingje. Krahas testit të shkurtër të vozitjes, kandidatët duhet të kenë së paku nëntë përgjigje të sakta në testin me shkrim të përbërë nga 20 pyetje, ndërsa çmimi i testit të vozitjes është vetëm 1.20 euro.
Kroacia – vendi në të cilin është më e vështira për të kaluar testin e shoferit
Nga ana tjetër, portali thekson se Kroacia është vendi në të cilin është më e vështira për të kaluar testin e shoferit. Ata deklarojnë se 85 orë vozitje është një pjesë e detyrueshme e kalimit të testit të shoferit në Kroaci, gjë që e bën atë tepër të shtrenjtë (rreth 1100 euro).
Ata shpjeguan gjithashtu se kostoja mesatare e testimit në mbarë botën është 127 euro dhe kroatët duhet të paguajnë mesatarisht 991 euro më shumë se shumica e vendeve.
