Një shtetas i Shqipërisë është arrestuar të shtunën në Vërmicë si njëri nga të dyshuarit për 1 ton drogë që u zbulua vitin e kaluar në Sferkë të Klinës.
Shtatorin e vitit të kaluar, policia pati gjetur një plantacion narkotikësh në fshatin Sferkë të Klinës.
Në atë rast u pat konfiskuar mbi 1 ton drogë e llojit kanabis, vlera e të cilit shkonte në mbi 5 milionë euro.
Policia ka arritur të arrestojë një të dyshuar, shtetas i Shqipërisë, për këtë rast.
Rastin e ka konfirmuar Shkodran Nikçi, zëdhënës i Prokurorisë Themelore në Pejë.
“Është ndaluar një person në Vërmicë, i cili dyshohet për kultivim të narkotikëve, përkatësisht për kultivimin e mbi 3 mijë kg narkotik në fshatin Sfërkë të Klinës. Është shtetas i Republikës së Shqipërisë. I njëjti është ndaluar me urdhër të Prokurorit të Shtetit, ndërkohë prokurori i shtetit është duke e përpiluar kërkesën për caktimin e masës së paraburgimit”, ka thënë Nikçi.
Për këtë rast, ka pasur edhe të tjerë të arrestuar.
Në ditën kur policia kishte ndërmarrë aksionin në plantacionin në fjalë, patën arrestuar të dyshuarin Aleks Gerbi, shtetas shqiptar. Ndërkaq, u pat thënë se janë edhe 6 të tjerë të dyshuar.
