Punëtorët që pensionohen sivjet në Korporatën Energjetike të Kosovës, s’do të largohen prej aty pa dhuratë. Në total janë 176 punëtorë që do të pensionohen, e për secilin prej tyre KEK po planifikon të blejë nga një orë dore, shkruan Gazeta Online Reporteri.net.
Blerja e këtyre orëve, pritet të kushtojë 29 mijë euro, me të cilat do të blihen 165 orë dore për burra me llogo të KEK’ut dhe 11 orë për gra, poashtu me llogo të korporatës.
Bazuar në vlerën e parashikuar të kontratës dhe sasinë e orëve që do të blihen, një orë parashihet të kushtojë rreth 165 euro.
Furnizimi me këto orë parashihet të kryhet për 30 ditë nga dhënia e kontratës.
Afati i fundit për dorëzimin e ofertave, përfundon me 24 tetor, në orën 12:00.
“Ofertat pranohen vetem në mënyrë elektronike (Permes E Prokurimit)”, theksohet në dosje.
Ndryshe, KEK edhe më herët ka blerë ora dore për punëtorët që janë pensionuar./Reporteri.net
