Korporata Energjetike e Kosovës është kritikuar vazhdimisht viteve të fundit për dhënien e tenderëve në vlerë prej dhjetëra miliona euro me procedurë të negociuar, ku për njërin prej tyre i është ngritur aktakuzë ish kryeshefit Nagip Krasniqi.
Mirëpo, duket se kjo ndërmarrje po vazhdon avazin e vjetër edhe me menaxhmentin e ri, pasi që sot në KRPP ka shpallur tender në vlerë prej 137 milionë e 340 mijë euro me procedurë konkurruese me negociata, raporton Veriu.info.
Përmes këtij tenderi synohet Rehabilitimi dhe modernizimi i njësis A3 në TC Kosova A.
Në dosjen e tenderit thuhet se: Autoriteti Kontraktor (v.j. KEK) do të zhvillojë negociata në faza të njëpasnjëshme me të gjithë kandidatët që kanë paraqitur tenderë të përgjegjshëm.
Bëhet e ditur se afati i fundit për dorëzim të aplikacioneve është data 01.04.2025, përderisa thuhet se naksimum 6 kandidatë do të ftohen për të dorëzuar tenderët e detajuar për këtë kontratë.
Në dosjen e këtij tenderi të siguruar nga Veriu.info, shihet se kriter kryesor nuk është çmimi më i ulët ofertues, pasi që si kriter i dhënies së tenderit është përcaktuar se fitues do të shpallet ofertuesi më i favorshëm ekonomikisht. Me këtë rast 60% do të poentohet çmimi, 20% periudha e kompletimit dhe 20% karakteristikat funksionale./Veriu.info
