Të ardhurat e sadakasë, vitrave, zeqatit, anëtarësisë si dhe qerave të objekteve të Këshillit të Bashkësisë Islame të Kosovës në Prishtinë dyshohet të jenë keqpërdorur për tre vjet me radhë.
Që nga viti 2020 deri më 2022 parat e BIK dyshohet të jenë tërhequr nga arka “cash” pa mbulesë, e përmes llogarive bankare të kenë shkuar në llogari të ndryshme, herë me përshkrim të arsyes e herë pa të.
Personi që po dyshohet se i ka përvetësuar qindra mijëra euro është ish-arkëtari i Bashkësisë Islame për Prishtinë, Bahri Rexha.
Në Kallzimin Penal thuhet se ekziston dyshimi i bazuar se i dyshuari duke keqpërdorur besimin në cilësinë e arkëtarit të KBI, në vazhdimësi nga viti 2020, 2021, 2022, dhe 2023, me qëllim të përfitimit material, ka keqpërdorur fondetet nga buxheti i Bashkësisë Islame të Kosovës.
Sipas Kallëzimit Penal të cilin e ka parë Sinjali, Rexha dyshohet se ka kryer këto vepra penale: “Mashtrimi”, “Keqpërdorimi i Besimit”, “Përvetësimi në detyrë”, “Përdorimi i paautorizuar i pasurisë” dhe “Vjedhja”.
Nën këto dyshime, Bahri Rexha fillimisht është suspenduar nga detyra, më 5 mars të vitit 2023.
Ndërkaq, nëntë muaj pas, përmes masës disiplinore, është larguar nga puna si arkëtar i Bashkësisë Islame të Kosovës në Prishtinë.
