Janë arrestuar dy persona të dyshuar për grabitjen e armatosur që ka ndodhur në orët e hershme të mëngjesit në Motelin “Villa Premium” në Qagllavicë.
Siç pati raportuar ekskluzivisht Sinjali rasti ka ndodhur më 26.12.2025, rreth orës 05:10, në rrugën Çagllavicë–Llapnasellë, ku një person i maskuar, nën kërcënimin e revoles, ka grabitur recepsionistin P.B., duke i marrë rreth 1.200 euro para kesh.
Pas hetimeve intensive nga Njësia e Grabitjeve, më 09.01.2026 është identifikuar dhe arrestuar i dyshuari Valmir Bytyqi, rreth 32-vjeçar.
I njëjti është intervistuar në prezencë të avokatit dhe ka pranuar kryerjen e veprës penale. Me vendim të Prokurorit Kujdestar për Krime të Rënda, ai është dërguar në paraburgim për 48 orë, për hetime të mëtejme.
Në vazhdimësi të rastit, me urdhër të Prokurorit të Krimeve të Rënda, rreth orës 16:00 të datës 09.01.2026, është kryer bastisje në shtëpinë e personit të dytë të dyshuar, në Sllovi të Komunës së Lipjanit. Rreth orës 16:50, i dyshuari Mirlind Pacolli është paraqitur në Stacionin Policor në Lipjan, ku pas intervistimit, me vendim të prokurorit, është dërguar gjithashtu në paraburgim 48-orësh.
Rasti po trajtohet si “Grabitje”, ndërsa hetimet po vazhdojnë nën drejtimin e Prokurorisë kompetente.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
