Vitin e kaluar Veriu.info kishte raportuar se në “American Hospital Kosova II” që gjendet në Graçanicë (magjistralja Prishtinë – Shkup), janë hasur duke punuar tre mjekë të huaj pa licencë pune, që nënkupton se të njëjtit kishin ushtruar veprimtarinë mjekësore në mënyrë të jashtëligjshme.
Në kuadër të hulumtimeve për parregullsitë në sektorin privat të shëndetësisë, Veriu.info ka siguruar vendimin e plotë dhe raportin e inspektimit të inspektorëve shëndetësorë të MSh-së për këtë rast, për të cilat shkelje “American Hospital Kosova II” me themelues Klodian Allajbeu ishte gjobitur me pesë (5) mijë euro.
Në arsyetimin e vendimit të Inspektoratit Shëndetësor të siguruar nga Veriu.info që mban datën 03.06.2025, thuhet se pas verifikimit në Divizionin për Licencim dhe Akreditim të Ministrisë së Shëndetësisë është kuptuar se nuk janë staf i “American Hospital Kosova II” e as nuk posedojnë licenca valide të Republikës Kosovës: Dr. Ozan Aslan, Dr. Ali Capar, Dr. Emrah Arsllan.
Raporti i inspektimit i Inspektoratit Shëndetësor specifikon të gjeturat në “American Hospital Kosova II”, ku tregohet se Dr. Ozan Asllan dhe Emrah Asllan kanë ofruar konsultime për pacient, edhe pse ishin të pa licencuar.
“Sipas publikimit të faqes së “American Hospital Kosova II” janë disa fakte që Dr. Ozan Aslan ka ardhur për kryerjen e disa intervenimeve estetike”, thuhet në raportin e inspektimit.
Në deklaratën e “American Hospital Kosova II” lidhur me doktorët në fjalë, thuhet se të njëjtit kanë ardhur në Kosovë për ofrimin e konsultave ndërgjegjësuese për popullatën lidhur me nevojat e ndërhyrjeve mjekësore në fushën e kirurgjisë estetike.
Pas inspektimit të kryer, në raport inspektorët kanë nxjerrë konstatimet se Dr. Ozan Aslan, Dr. Ali Ertan Capar dhe Dr. Emrah Aslan nuk janë të licencuar dhe ofrojnë konsultime në “American Hospital Kosova II” si persona të pa autorizuar dhe pa licenca valide të punës, duke theksuar se janë gjetur fakte të termineve për ndërhyrje estetike të Dr. Ozan Asllan dhe Dr. Emrah Asllan.
Në fund të raportit të inspektimit janë nxjerrë edhe rekomandimet me të cilat Dr. Emrah Arsllan, Dr. Ali Ertan Capar dhe Dr. Ozan Asllan u ndalohet ofrimi i shërbimeve shëndetësore në “American Hospital Kosova II” deri në licencim nga Ministria e Shëndetësisë.
Veriu.info i ka dërguar pyetje në “American Hospital Kosova II” në lidhje me këtë vendim të inspektoratit shëndetësor më 8 janar, por deri në momentin e publikimit të këtij artikulli nuk kemi marrë përgjigje.
Vendimi:
Raporti i Inspektimit:
