Deputetët e Kuvendit të Republikës së Kosovës do të mblidhen sërish sot për të 22-tën herë më radhë, për të vazhduar punimet e seancës konstituive të legjislaturës së nëntë, ku në rend dite janë zgjedhja e kryetarit dhe të nënkryetarëve të Kuvendit të Kosovës.
Deputetja nga ardhët e LDK-së Doarsa Kica-Xhelili tha se derisa nuk ka ndryshim të rrethanave, nuk ka ndryshim as të qëndrimeve sa i përket votimit për kryetare të kuvendit.
“Skemi çka me shtu përtej kësaj. Gjërat janë të thjeshta, jemi në mungesë të një marrëveshje politike. Në mes të një procesi nuk mund ta ndryshosh mënyrën si votohet. Ne nuk jemi pjesë e asnjë marrëveshje politike dhe s’kemi as pse t’i ndryshojmë qendrimet tona”, tha ajo.
Ndërsa e pyetur rreth mundësisë së votimit të ndonjë nga deputetët e LDK-së në rast të votimit të fshehtë, ajo tha se nuk ka fakte për këtë dhe se këto janë vetëm hipoteza.
“Ka pasur zëra për shumëçka. S’jam për të diskutuar hipoteza. Fakte nuk kam. Kam për të kundërten që jemi unik në qëndrimet tona”, tha Kica-Xhelili./Indeksonline/
