Kina e ka kritikuar ashpër vendimin e administratës Trump për të ndaluar Universitetin e Harvardit të regjistrojë studentë ndërkombëtarë, duke e quajtur një vendim të motivuar politikisht që dëmton reputacionin global të Shteteve të Bashkuara.
Sipas CNN, një zëdhënës i Ministrisë së Jashtme të Kinës, ka thënë se: “Kina ka qenë gjithmonë kundër politizimit të bashkëpunimit arsimor. Ky veprim vetëm sa do ta njollosë imazhin dhe reputacionin e SHBA-së në botë.”
Vendimi i fundit, i shpallur nga Departamenti i Sigurisë Kombëtare (DHS), shihet si një përshkallëzim i rivalitetit në rritje mes Uashingtonit dhe Pekinit dhe pjesë e një fushate më të gjerë për të forcuar kontrollin ndaj studentëve ndërkombëtarë në SHBA, në kuadër të një goditjeje të ashpër ndaj emigracionit. Kujtojmë se, gjatë administratës së presidentit Donald Trump, qindra viza studentore janë revokuar në pothuajse çdo cep të vendit.
Ndërkohë, kritikët kanë paralajmëruar se, ndërsa SHBA forcon kontrollin mbi arsimin ndërkombëtar, universitetet amerikane — dhe vetë prestigji akademik i vendit — mund të pësojnë dëme afatgjata.
