Granit Xhaka e ka arritur formën jetësore me Bayer Leverkusenin, ku e kaloi ndoshta vitin më të mirë në karrierë në 2024-ën.
Ylli kosovar e udhëhoqi ekipin “Farmaceutik” drejt titullit historik të kampionit në Bundesligë, ndërsa e fitoi edhe Kupën e Superkupën e Gjermanisë, për të shkuar gjithashtu deri në finale të Ligës së Evropës.
Përfaqësuesi zviceran po vazhdon me formë stabile edhe në këtë edicion duke u treguar lider i padiskutueshëm në fushën e blertë nën urdhrat e trajnerit Xabi Alonso.
Ndërkohë, kjo ka bërë që ish-futbollistit të Baselit, Borussia Monchengladbachut e Arsenalit t’ia mësyjë gjiganti nga Stambolli, Galatasaray.
Lajmin e kanë bërë të ditur sot mediat turke.
32 vjeçari ka kontratë me klubin gjerman deri në vitin 2028.
Mbetet të shihet nëse Kuqezinjtë do të jenë të gatshëm ta shesin yllin e tyre, i cili në sezonin e kaluar i zhvilloi 40 ndeshje me Leverkusenin dhe i realizoi dy gola, derisa i bëri shtatë asistime, krahas kontributeve të tjera të mëdha në fushën e blertë.
