Ishte viti 2017 dhe po festohej 9-vjetori i Pavarësisë së Kosovës.
Albin Kurti, asokohe deputet opozitar në Kuvendin e Kosovës, deklaronte se nuk gjente arsye për të festuar përvjetorin e shtetësisë.
Kurti, e cilësonte pavarësinë si një akt pa substancë dhe se situata në Kosovë e shtynte atë të mos gjente arsye të fesonte Ditën e Pavarësisë.
“Kosova nuk ka fituar substancë të pavarësisë, vazhdon të mbetet vendi me papunësinë dhe varfërinë më të madhe në Evropë, ndërkohë që nuk e kemi bashkuar Mitrovicën dhe nuk po lejohet bashkimi i ushtrisë në Kosovë që do të mundësonte edhe integritetin territorial”, kishte thënë Kurti në një intervistë në televizionin Top Channel më 2017.
“Politikanët shqiptarë kanë qenë nganjëherë naiv, nganjëherë moskokëçarës dhe shpeshherë të korruptuar dhe të shantazhuar dhe na kanë sjellë në një situatë ku 9 vite pas shpalljes së pavarësisë nuk po mund të festojmë siç duhet”, kishte deklaruar Kurti.
Si shef i qeverisë, Kurti e ka gjetur arsyen për festë në Ditën e Pavarësisë.
Të hënën e 17 shkurtit, ai falënderoi popullin, heronjtë, dëshmorët, veteranët dhe invalidët e luftës në përvjetorin e 17-të të pavarësisë.
“Teksa festojmë kujtojmë me krenari rrugëtimin tonë të gjatë drejt lirisë dhe pavarësisë”, tha Kurti në mbledhjen festive të Qeverisë së Kosovës më 17.02.2025.
Ai tha se Kushtetuta e shtetit vërtetë është e re, por kultura e Kosovës është ajo e një populli të lashtë dhe autokton e rrënjosur thellë në historinë e lavdishme.
