Në kuadër të hulumtimit për kompanitë që kanë futur ose tentuar të fusin produkte ushqimore në Kosovë me përbërës të rrezikshëm, Veriu.info ka gjetur se kompanisë “Butrinti Group” Sh.P.K. i është refuzuar futja në Kosovës e 24 mijë 510 kg miell nga Italia.
Veriu.info ka siguruar vendimin e Agjencisë së Ushqimit dhe Veterinarisë, ku thuhet se refuzohet importi i këtij mielli, pasi që Inspektori Fitosanitar pas analizave laboratorike ka konstuar se nuk është bërë pasurimi i miellit me hekur dhe acid folik, sipas Udhëzimit Administrativ të Ministrisë së Bujqësisë.
Me këtë vendim të nxjerrë nga inspektori sanitar është urdhëruar kompania të bëjë kthimin e miellit në vendin e origjinës.
Në dokumentet e siguruar nga Veriu.info të AUV, shihet se mielli është importuar nga Italia në fund të vitit 2024 nga kompania “Butrinti Group” Sh.P.K. me pronar Butrint Zeka dhe adresë Graçanicë.
Në prezantimin e kompanisë në faqen e saj në Facebook, thuhet “Butrinti Group” merret me shitjen e lëndës së parë për prodhimet e furrave të bukës dhe të pastiqerive.
Cilat janë rreziqet nga mos pasurimi i miellit me Acid Folik e hekur (Fero Sulfat)?
Rreziqet nga mungesa e Acidit Folik janë:
- Defekte te fëmijët e sapo lindur
- Anemi megaloblastike
- Rrezik për komplikime në shtatzëni
Rreziqet nga mungesa e Fero Sulfatit:
- Anemi nga mungesa e hekurit
- Rritje e ndjeshmërisë ndaj infeksioneve
- Vonesë në zhvillim te fëmijët
