Biznesmeni nga Britania e Madhe, Sir Jim Ratcliffe, është i fundit që ka bërë një ofertë për blerjen e klubit të Chelseat.
Roman Abramovich e nxori klubin londinez në shitje pas sanksioneve që i vendosi Britania e Madhe ndaj tij.
“BBC” sot ka raportuar se Ratcliffe ka bërë një ofertë për blerjen e Chelseat. Oferta e tij është 4.25 miliardë funte.
1.75 miliardë funte janë të ndara për investime në klub për dhjetë vitet e ardhshme, kurse 2.5 miliardë janë të destinuara për një fond bamirësie për të mbështetur viktimat e luftës në Ukrainë.
Sir Jim Ratcliffe është themelues i “Ineos”. Kjo kompani është e njohur në botën sportive për sponsorizimin e skuadrës së çiklizmit “Team Ineos”.
“Kjo është një ofertë britanike, për një klub britanik”, thuhet në komunikatën e “Ineos”.
“Ne do të investojmë në Stamford Bridge për ta bërë atë një stadium të klasit botëror, që i përshtatet Chelsea FC. Kjo do të jetë organike dhe e vazhdueshme në mënyrë që ne të mos largohemi nga shtëpia e Chelseat dhe të rrezikojmë të humbasim mbështetjen e tifozëve besnikë. Ne do të vazhdojmë të investojmë në ekip për të siguruar që të kemi një skuadër të klasit të parë të lojtarëve më të mëdhenj në botë, trajnerëve dhe stafit mbështetës, në skuadrat e meshkujve dhe femrave. Dhe ne shpresojmë të vazhdojmë të investojmë në akademi për t’u ofruar mundësi të rinjve të talentuar të zhvillohen në lojtarë të klasit të parë. Ne besojmë se Londra duhet të ketë një klub që pasqyron qytetin. Një klub që mbahet në të njëjtin drejtim si Real Madridi, Barcelona ose Bayern Munich. Ne synojmë që Chelsea të jetë ai klub”, thuhet mes tjerash në komunikatën e lëshuar nga “Ineos”.
Mbetet të shihet në ditët në vazhdim nëse miliarderi britanik do ta marrë nën pronësi klubin e Chelseat.
