Konfliktet mes vëllezërve në qytetet e ndryshme të vendit, shpesh herë përfundojnë me sharje e ofendime ndaj njëri-tjetrit. Ata madje me raste eskalojnë në kërcënime e përleshje fizike, duke u dashur kështu intervenimi i Policisë për të zgjidhur telashet, raporton Gazeta Sinjali.
Një konflikt ka ndodhur edhe sot në një familje në Prishtinë, ku janë përfshirë dy vëllezër.
Sinjali mëson se i riu dyshohet se ka kërcënuar me jetë vëllain e tij, të cilit i ka thënë se e ther me thikë dhe e mbytë. Për të evituar më të keqen që kanosej, mes zënkës kanë ndërhyrë familjarët tjerë të cilët kanë tentuar që të qetësojnë situatën.
Përballë këtyre kërcënimeve, viktima është ndjerë i shqetësuar dhe i frikësuar dhe për këtë arsye ka kërkuar ndihmën e Policisë, ku para hetuesve ka rrëfyer në detaje gjithë ngjarjen.
I dyshuari është arritur që të arrestohet dhe ndaj tij është iniciuar rasti ‘Dhunë në familje’.
Me urdhër të prokurorit, i dyshuari është dërguar në mbajtje për 48 orë.
