Glauk Konjufca tha se skenari më normal i formimit të institucioneve të reja, e vendos Lëvizjen Vetëvendosje në udhëheqje të qeverisë së ardhshme.
Ai tha se do të ketë përgjegjësi në qeverinë potenciale Kurti 3.
“Do të ishte dëm shumë i madh për Kosovën nëse ky fitues [Vetëvendosja] nuk do ta bënte Qeverinë e Kosovës. Skenari më normal nëse e përktheni rezultatin e zgjedhjeve, do të ishte që Vetëvendosja ta ketë qeverinë dhe z. Kurti të vazhdojë me kryeministrinë”, tha ai të premten në një deklaratë për mediat.
“Do ta kem një përgjegjësi në qeverinë e re. Me gjasë do të jetë diplomacia, sipas të gjithsa gjasave”, u shpreh Konjufca.
Ai, para vazhdimit të seancës konstituive të premten, tha se Vetëvendosje nuk ka votë për asnjë propozim për nënkryetar të Kuvendit i cili vjen nga Lista Serbe.
