Kryeparlamentarja Albulena Haxhiu e ka shpallur të konstituuar Kuvendin, pa zgjedhjen e nënkryetarit nga Partia Demokratike e Kosovës.
“Me këtë rast, konstatoj që Kuvendi i Republikës së Kosovës konsiderohet i konstituuar dhe shihemi në seancën e radhës”, tha ajo pasi Emilia Rexhepi u zgjodh nënkryetare e Kuvendit nga minoritetet joserbe.
Paraprakisht, Kujtim Shala i LDK-së dhe Tanja Vujeviq nga Lista Serbe u zgjodhën nënkryetarë të Kuvendit.
Deputetët e PDK-së dhe ata të Aleancës nuk shkuan në Kuvend për vazhdimin e seancës konstituive.
PDK-ja para vazhdimit të kësaj seance tha se e pezullon kandidaturën e Çitakut për nënkryetare të Kuvendit deri në një vendim të Gjykatës Kushtetuese, pasi paralajmëruan dërgimin e çështjes atje të premten, kur LVV-ja nuk ia votoi këtë propozim.
