Operatori Sistemi, Transmisioni dhe Tregu-KOSTT ka siguruar qytetarët e Kosovës se furnizimi me energji elektrike mbetet i pandërprerë dhe i sigurt pas shpërthimit që ndodhi në kanalin e Ibër-Lepencit në Zubin-Potok.
Në një njoftim, KOSTT theksoi se incidenti në kanalet e ujitjes nuk ka ndikuar në furnizimin me energji elektrike dhe se situata është monitoruar nga ekipet e kompanisë për të garantuar stabilitetin e sistemit të energjisë.
“KOSTT informon të gjithë qytetarët e afektuar dhe të gjitha palët e interesuara se incidenti i raportuar së fundmi në kanalet e ujitjes në Ibër Lepenc në Zubin Potok nuk ka asnjë ndërlidhje me ndërprerjet e energjisë që lidhen me NS Prishtina 1, të shkaktuara nga incident i lokalizuar.
Furnizimi me energji elektrike mbetet i sigurt dhe pa ndërprerje në të gjithë territorin e vendit. Po ashtu, ekipet tona janë duke monitoruar në mënyrë të vazhdueshme situatën për të garantuar stabilitetin dhe funksionimin e sigurtë të sistemit të energjisë elektrike”, thuhet në njoftim.
