Albert Krasniqi nga shoqëria civile, ka thënë se dje kryesuesi i seancës konstituive, Avni Dehari, u desh ta hapte seancën me një kërkim falje për të gjithë deputetët, për veprimet e tij kundërkushtetuese.
Përmes një postimi në Facebook, ka thënë se Dehari me arrogancë kërkonte nga regjia t’ua ndalte mikrofonin, sa herë që deputetët i rikujtonin Aktgjykimin e Gjykatës Kushtetuese.
“Më e natyrshmja do të ishte që ai të tërhiqej krejtësisht nga kryesimi i seancës konstituive”, ka shkruar ai.
Postimi i tij i plotë:
Avni Dehari, të paktën, do të duhej ta kishte hapur seancën e djeshme me një kërkim falje ndaj deputetëve për veprimet e tij kundërkushtetuese.
Sa herë që deputetët i rikujtonin Aktgjykimin e Gjykatës Kushtetuese, ai me arrogancë kërkonte nga regjia t’ua ndalte mikrofonin.
Më e natyrshmja do të ishte që ai të tërhiqej krejtësisht nga kryesimi i seancës konstituive.
– Imponoi në mënyrë arbitrare një opsion kundërkushtetues.
– Injoroi aktgjykimin e Gjykatës Kushtetuese për më shumë se një muaj.
– Dëshmoi se nuk është në gjendje të veprojë i pavarur nga diktati partiak.
Një kryesues i seancës konstituive duhet të mbrojë rendin kushtetues dhe dinjitetin e Kuvendit, jo ta cenojë atë.
