Pas dështimit të seancës konstituive të Kuvendit të Kosovës për herën e shtatë, deputetën e partive politike kanë folur para mediave.
PDK-ja është e gatshme që nga sot të diskutojë për zgjedhje të reja, tha kryetari i kësaj partie, Memli Krasniqi.
“Unë tashmë kam diskutuar për këtë çështje. Kam propozuar edhe datën e mundshme. Dhe nëse vërtet Lëvizja Vetëvendosje s’dëshiron me dalë prej bllokadës, atëherë më mirë është me shku në zgjedhje”, tha ai, pasi për herë të shtatë dështoi të konstituohet Kuvendi, meqenëse kandidatja e LVV-së për kryeparlamentare, Albulena Haxhiu nuk i mori 61 votat e nevojshme.
Ndërsa deputeti i Vetëvendosjes Hekuran Murati, ka thënë se për Vetëvendosjen zgjedhjet janë skenari i fundit.
“Skenari për zgjedhje mbetet skenari i fundit për neve si subjekt fitues, nuk është që s’jemi të gatshëm, ne do të ishim të gatshëm, ne mendojmë se qytetari e ka thënë fjalën e vet dhe të gjitha subjektet duhet të pajtohen me atë rezultat tash sado që mund të mos i pëlqej dikujt”, tha ai.
