Kryetari i Partisë Demokratike të Kosovës, Memli Krasniqi, ka thënë se është jashtëzakonisht i lumtur dhe krenar për Shqipërinë, e cila dje hapi kapitujt e parë të negociatave për anëtarësim në Bashkimin Evropian.
Krasniqi ka thënë se me një Qeveri në krye me Bedri Hamzën, një perspektivë e tillë e pret edhe Kosovën.
“ Një kapitull historik dhe mëse i merituar, i cili vjen pas një pune të përgjegjshme dhe tejet të madhe të cilën Shqipëria e ka bërë viteve të fundit. Shqipëria po dëshmon se përmes bashkëpunimit, seriozitetit dhe zbatimit të reformave të brendshme, hapen perspektiva të jashtëzakonshme për shtetin dhe shoqërinë, siç është edhe ëndrra dikur e largët, për t’u bërë pjesë e BE-së.
Me qeverinë e re të Kosovës, në krye me Bedri Hamzën, një perspektivë e tillë e pret edhe shtetin tonë. Urime Shqipërisë, Kryeministrit Rama dhe të gjithë qytetarëve shqiptarë!”, ka shkruar Krasniqi.
