Kryeministri i Kosovës, Albin Kurti ka shprehur krenarinë dhe mirënjohjen e tij për arritjen e xhudistes Distria Krasniqi në Lojërat Olimpike Paris 2024.
Kurti ka thënë se Kosova fitoi medaljen e parë në këto Lojëra Olimpike me shkëlqimin e argjendtë të Distria Krasniqit në xhudo për femra në kategorinë deri në 52 kilogramë.
“Jemi krenarë me këtë rezultat që lartëson vendin tonë në sportin elitar botëror dhe e konfirmon që Kosova mbetet Shtet i Xhudos. Të faleminderit Distria për gëzimin dhe shembullin që na jep”, ka shkruar Kurti në Facebook.
Krasniqi pati një performancë të jashtëzakonshme gjatë gjithë ditës, duke fituar tri ndeshje me kohë rekord: të parën për 39 sekonda, të dytën për 66 sekonda dhe të tretën pas 6 minutash e 10 sekondash (2:10 sekonda në vazhdimin që quhet Golden Score).
