Në takimin e radhës me përfaqësues të partive parlamentare të komuniteteve jo shumicë, krymeministri në detyrë i Republikës së Kosovës, Albin Kurti, priti deputeten e rizgjedhur të Kuvendit të Republikës nga radhët e komunitetit boshnjak, kryetaren e Unionit Socialdemokrat (SDU), Duda Balje.
“Kurti e uroi Baljen për mandatin e ri në Kuvendin e Republikës së Kosovës. Diskutuan për procesin dhe rëndësinë e formimit të institucioneve pas certifikimit të rezultateve të zgjedhjeve të 9 shkurtit dhe për mundësitë e vazhdimit të bashkëpunimit të deritanishëm në ekzekutiv dhe legjislativ”, thuhet në njoftimin e Kryeministrisë.
Pjesë e takimit ishte edhe zëvendësministri i Zhvillimit Rajonal, Eldin Uglari, i cili vjen nga radhët e partisë që drejtohet nga Balje.
Nga ana tjetër, pas përfundimit të takimit, Balje tha përpara mediave se në këtë takim ka paraqitur kërkesat e komunitetit që përfaqëson, si krijimi i një komune boshnjake në Kosovë si dhe reforma në arsim.
“Sot kemi pasur takimin e parë. Dola para kryeministrit me kërkesat që ne si boshnjakë i kemi. Nuk kemi marrë asnjë konfirmim dhe nuk kemi dhënë asnjë konfirmim. Është takimi i parë tani për tani, jemi në fazën e bisedimeve, nuk ka ende asgjë konkrete. Kërkesat janë komuna e boshnjakëve, reformat në arsim dhe trajtimi i barabartë me të gjithë deputetët”, tha Balje.
