Seanca e parlamentit të porsazgjedhur të Kosovës u anulua të martën pasi dështoi të konstituojë deputetët e rinj, një zhvillimin që mund ta fusë vendin në një sagë të zgjatur ligjore përpara se të mund të formohet një qeveri e re.
Në lidhje me situatën e krijuar, ish-gjyqtari dhe njohësi i çështjeve kushtetuese, Kadri Kryeziu, në emisionin “DPT me Fidanin”, sqaroi situatën rreth bazës ligjore të kësaj ngërçi.
Sipas tij, në këtë fazë, partitë politike nuk kanë të drejtë të kërkojnë interpretim nga Gjykata Kushtetuese, pa u formuar Grupet Parlamentare.
“Partitë politike nuk kanë të drejtë [ta shtrojnë çështjen në Gjykatë Kushtetuese], duhet Grupet Parlamentare, e Grupet Parlamentare nuk janë kriju ende. Në momentin kur krijohen kanë të drejtë me dërgu në Gjykatë Kushtetuese. Grupet Parlamentare mund të krijohen kur të japin betimin. Deri në betim, këta nuk janë deputetë legjitim, janë vetëm legal. Edhe Presidentja ka mundësi me dërgu në Gjykatën Kushtetuese me sqaru situatën.” – tha Kryeziu.
Kryeziu shtoi se bllokada aktuale nuk është as juridike dhe as kushtetuese, por krejtësisht politike.
“Presidentja s’ka asnjë punë tash. Ajo e ka pasë vetëm detyrë me caktu datën e konstituimit. Kjo nuk ka afat kushtetues. Afati kushtetues lidhet kur konstituohet Parlamenti dhe partia më e madhe e dërgon emrin për mandatim. Në momentin e mandatimit, 60 ditë mund të shkojë kështu edhe pas 60 dite të shkohet në zgjedhje të jashtëzakonshme. Bllokada nuk është juridike as kushtetuese – është politike.” – tha ai.
