Profesori amerikan, Charles Kupchan, në një intervistë për Radio Evropa e Lirë ka folur për Administratën e re amerikane dhe për qasjen ndaj Kosovës dhe Serbisë, shkruan Gazeta Express.
Kupchan ka thënë se Kosova duhet të jetë e kujdesshme ndaj hapave që Trump mund t’i konsiderojë si të padobishëm, meqë thotë se ai s’i pret mirë politikat që mendon se janë pengesa.
“Palët e përfshira Beogradi dhe Prishtina duhet të jenë të kujdesshme ndaj hapave që Trump mund t’i shohë si të padobishëm. Trump nuk i pret mirë politikat që mendon se janë pengesë drejt marrëveshjes për paqe”, ka thënë Kucphan.
“Nëse doni raport të mirë me SHBA bëni marrëveshje, futuni në pazar, jeni gati për negociata. Ju duhet ta shihni Trumpin si një president jo ideologjik, ai s’mendon për historinë e luftërave në Ballkan, s’ka ndonjë pikëpamje të veçantë për multi-etnicitetin. Ai thjesht do të kryej punë. Mendoj se Qeveria e Kosovës duhet t’i qaset me këtë pragmatizëm sepse do t’i shpaguhet”, ka shtuar tutje ai.
