Një prej projekteve më të mëdha infrastrukturore të Komunës së Gjilanit, bulevardi i ri që ishte promovuar nga kryetari Alban Hyseni si investim strategjik për transformimin urban të qytetit, është pezulluar përkohësisht. Komuna qysh në fillim të këtij tenderi kishte bërë shkelje të ligjit. Nga 40 ditë sa është i paraparë afati i garës për operatorët ekonomikë, komuna e kishte shkurtuar në 20 ditë.Por, tashmë tenderi është pezulluar për një arsye tjetër. Komuna po akuzohet për kurdisje.
Në Gjykatën e Tenderëve janë deponuar ankesa për diskriminim nga ana e Komunës se Gjilanit.
Me 18.06.2025, Komuna kishte rekomanduar për kontratë grupi i OE “B-Bardhi SH.P.K&Besa Company SHPK&Linda me çmim prej: 17,988.067.70 €.
Në këtë tender kishin ofertuar katër kompani, dy prej tyre edhe me çmim me të ulët.
Pas rekomandimit, të B-Bardhi SH.P.K&Besa Company SHPK&Linda, disa kompani janë ankuar për shkelje të ligjit nga ana e Komunës.
Pretendimet për kurdisje të tenderit
Një operator është ankuar se Komuna e Gjilanit, ka dëmtuar buxhetin duke rekomanduar për kontratë dallim në çmim raport me ofertën 492,369.86 €.
“Me këto veprime të AK-së është cenuar edhe neni 6 parimi i ekonomicitetit sepse ne kemi ofruar çmim më të lirë se sa grupi i OE të rekomanduar për kontratë në vlerë prej 492,369.86 €. Me këtë vlerë Komuna e Gjilanit mund të përfundojë edhe ndonjë projekt shumë të rëndësishëm për qytetarët e komunës së Gjilanit”, thuhet në ankesë.
Sipas tyre komuna ka shkelur nenet:
Neni 1- Qëllimi
Neni 6 – Ekonomiciteti dhe Efikasiteti
Neni 7 – Barazia në Trajtim/ Jo- Diskriminimi
Neni 13 – Përdorimi i gjuhëve në dokumentet e prokurimit publik
Neni 56 – Dispozitat e Përgjithshme mbi Përzgjedhjen e Pjesëmarrësve dhe Dhënien e Kontratave
Neni 59 – Ekzaminimi, Vlerësimi dhe Krahasimi i Tenderëve
Neni 60 – Kriteret për Dhënien e Kontratës
Neni 69 – Aftësia Teknike dhe/ose Profesionale
Neni 72- Dokumentacioni dhe informacioni shtesë
Sipas ankesës, kompania fituese nuk ka përmbushur kriteret pasi i mungojnë disa dokumente: Deklarata e qartë ku të gjithë anëtarët e grupit janë bashkërisht dhe individualisht përgjegjës, mungon deklarata e nënshkruar nga secili anëtar për konfirmim të pjesëmarrjes, mungon deklarata nënshkruar nga të gjithë anëtarët e grupit për autorizim të partnerit udhëheqës.
“Duke u bazuar në të gjitha faktet e lartcekura, dhe argumentet tona konsiderojmë se grupi i OE të rekomanduar për kontratë nuk i ka plotësuar të gjitha kërkesat e dosjes së tenderit dhe si i tillë është i papërgjegjshëm dhe në asnjë mënyrë nuk mund dhe nuk është dashur të rekomandohet për kontratë”, thuhet në ankesë.
Kompania ankuese madje, ka pretenduar se ka pasur marrëveshje mes VMM GROUP SHPK që konkurroi ndaras dhe grupit të operatorëve ekonomik që fituan.
VMM GROUP SHPK, ofertoi me çmim me të lartë se kompania fituese, kjo sipas tyre u bë që në publik të mos dalin kompanitë që fituan tenderin, si me të shtrenjta.
“Fakti që paramasat e ofertës së OE të rekomanduar për kontratë janë pothuajse identike me ofertën e kompanisë VMM Group, me dallim vetëm në 3 pozicione nga gjithsej 138 faqe, është një tregues i qartë dhe serioz i koordinimit të qëllimshëm ndërmjet dy OE-ve. Një përputhje kaq e detajuar e çmimeve, përshkrimeve dhe strukturës tregon qartë për një marrëveshje të fshehtë për paraqitje të ofertave të koordinuara, të cilat në praktikën e prokurimit njihen si “marrëveshje karteli” ose “cover bidding” – forma më e zakonshme e manipulimit të tenderëve”
“Autoriteti Kontraktues pretendimin tone lidhur me marreveshjen e msheft dhe ligjitimetin e ofertes se VMM GROUP SHPK e trajton ne ketë forme, te paqarte dhe te pa sakte, i njëjti AK dhe se bashku dy OE / kane pasur marrëveshje me qellim qe oferta e VMM te del si oferte me e shtrejnt dhe ne publik te paraqitet se AK ka shpërblyer me kontrate një OE me te lire”, thuhet në ankesë.
Aty, madje është pretenduar se Komuna e Gjilanit kishte bashkëpunim me kompanitë e përfshira.
“Është alarmuese që Autoriteti Kontraktues deklaron publikisht se kompania VMM Group nuk ka dorëzuar as sigurimin e tenderit, dhe megjithatë e konsideron si ofertë të vlefshme dhe e përdor atë për krahasim për të justifikuar se kontrata është dhënë me çmimin më të ulët. Kjo tregon se VMM është futur në mënyrë të qëllimshme në tender për të krijuar iluzionin e konkurrencës, ndërsa në të vërtetë mungojnë të gjitha dokumentet bazë të ofertës”.
Kompania ankuese tha se gjatë vlerësimit të ofertave janë diskriminuar.
“Autoriteti kontraktues do ti trajtoj operatorët ekonomik në mënyrë të barabartë dhe jo-diskriminuese dhe do të veprojë në mënyrë transparente”, mirëpo AK-së nuk i është përmbajtur as kësaj dispozite ligjore, sepse na ka eliminuar pa asnjë bazë ligjore dhe pa asnjë dëshmi konkrete, ndërsa ka rekomanduar për kontratë OE i cili është i papërgjegjshëm”, thuhet aty.
Në përfundim u kërkua që Komuna e Gjilanit dhe kompanitë fituese të hetohen.
“Bashkëpunim i drejtpërdrejtë ndërmjet Autoritetit Kontraktues dhe OE-ve të përfshirë, me qëllim që: të manipulojnë çmimet, të eliminojnë operatorë realisht konkurrues, dhe të orientojnë dhënien e kontratës në mënyrë të paracaktuar.
Për rrjedhojë, të dy operatorët ekonomikë – VMM Group dhe grupi i OE të shpërblyer (B. Bardhi, Linda, Besa Commerce) – duhet të eliminohen nga gara si të përfshirë në kurdisje të tenderit, ndërsa Autoriteti Kontraktues duhet të hetohet për keqpërdorim të pozitës dhe shkelje të ligjit për prokurim publik”, shkruhet në ankesën e dorëzuar në OSHP.
