Kryeministri në detyrë, Albin Kurti ka folur mbi dallimet që kanë me Shtetet e Bashkuara të Amerikës, pas pezullimit të Dialogut Strategjik, teksa theksoi se marrëdhëniet nuk janë prishur.
Kurti tha se dallimet janë në fushën e diplomacisë, saktësisht veprimet ndaj strukturave ilegale në Kosovë, duke thënë se mospajtime kanë “për çështje operacionale dhe taktike”, shkruan Reporteri.net.
“Në shtyllën e diplomacisë, kemi disa dallime ku shumë shpesh kanë të bëjnë me qëndrimet tona në raport me Serbinë dhe veprimet ndaj strukturave ilegale në Kosovë. Përderisa pajtohemi për vlera, interesa dhe qëllime, ndonjëherë jo edhe për çështje operacionale dhe taktike”, tha Kurti.
Ai tha se marrëdhëniet e Kosovës dhe ShBA’së janë të thella dhe se tejkalojnë qeveritë.
Kurti theksoi se kanë komunikim të vazhdueshëm me ambasadën amerikane.
”Raportet, marrëdhëniet dhe lidhjet ndërmjet Republikës së Kosovës dhe Shteteve të Bashkuara të Amerikës dhe të popujve tanë janë të thella dhe i tejkalojnë qeveritë. Ne jemi të bindur se komunikimi i vazhdueshëm, i cili është i rregullt, do të bëj të mundur që të vazhdojmë të ecim përpara së bashku”, tha Kurti, gjatë mbledhjes së Qeverisë.
