Lëvizja Vetëvendosje po përballet me kritika të ashpra për ngërçin në konstituimin e Kuvendit, pas katër dështimeve radhazi për të zgjedhur Albulena Haxhiun si kryetare. Situata e tanishme bie në kundërshtim me deklaratat e kaluara të liderit të VV-së, Albin Kurti.
Në vitin 2014, Kurti kishte akuzuar ashpër PDK-në për zvarritjen e konstituimit të Kuvendit, duke thënë se “në një shtet të kapur ka qeveri pa Kuvend” dhe se “marrëveshjet jashtë Kuvendit janë antikushtetuese”. Po ashtu, në vitin 2017 ai kishte kërkuar një kandidat konsensual kur PAN nuk kishte votat për zgjedhjen e Kadri Veselit si kryetar.
Sot, situata është e përmbysur: VV po këmbëngul në kandidaturën e Haxhiut, edhe pse nuk i ka votat, dhe refuzon çdo mundësi për emër konsensual. Glauk Konjufca madje ka kërkuar marrëveshje politike me subjektet tjera për të siguruar votat – një qasje që dikur VV e quante shkelje të Kushtetutës.
Ky qëndrim ka shkaktuar kritika nga partitë opozitare dhe shoqëria civile, duke e akuzuar VV-në për standarde të dyfishta dhe bllokim të funksionimit institucional.
