Dy herë të paktën është ngritur çmimi i energjisë elektrike që prej ardhjes së tij në pushtet, por këto dhe shumë skandale me energjinë elektrike e ngritja e madhe e çmimeve nuk ishin në fjalimin e tij që e mbajti të dielën kur u mandatua për kryeministër nga Vetëvendosja.
Në fjalimin plot lavde, Kurti tha se e ka menaxhuar suksesshëm krizën më të madhe energjetike që ia atribuoi luftës ruse në Ukrainë teksa shtoi se ka ndërprerë punësimet partiake në ndërmarrje publike.
Mirëpo jo më larg se këtë javë është raportuar se edhe një zyrtar i Vetëvendosjes me kompaninë e tij ka marrë licencën për tregti me energjinë elektrike.
Të premten, edhe një biznes i lidhur ngushtë me partinë në pushtet është licencuar për tregti me energji elektrike nga Zyra e Rregullatorit të Energjisë (ZRRE).
“Energy for Change L.L.C”, në pronësi të Erzen Krasniqit, udhëheqësit të Qendrës së Lëvizjes Vetëvendosje në Dragash, sipas të dhënave në uebsajtin zyrtar të Vetëvendosjes, është shpërblyer me licencë për furnizim dhe tregti me energji elektrike, raporton Paparaci.
Kompania e Krasniqit është në listën e kompanive të afërta me VV-në, si ajo e vëllait të Luan Dalipit, që kanë marrë licencë për tregti me energji në kohën kur është shumëfishuar çmimi për blerjen e energjisë elektrike dhe kompanitë janë detyruar të dalin në tregun e hapur.
Ndërkaq, të dielën, Kurti tha se e ka luftuar suksesshëm krimin e organizuar e korrupsionin.
“Luftuam me shumë sukses krimin e organizuar e korrupsionin. E ndërpremë keqpërdorimin e skajshëm të ndërmarrjeve publike e punësimeve partiake”, ka thënë Kurti në Këshillin e Përgjithshëm.
“Do të kemi më shumë siguri energjetike e më pa ndotje të ambientit. Së pari menaxhuam suksesshëm pandeminë covid-19, kemi meneaxhuar me krizën energjetike dhe rritjen e kostos së jetesës e cila ishte e paparë në 50 vitet e fundit në kontinentin evropian”, ka thënë veç të tjerash Kurti.
