Politologu Dritëro Arifi, ka folur për kandidatët për kryetar të Prishtinës.
Ai tha për Gazeta Blic se ata kanë qenë të zhdukur për 365 ditë dhe tani kanë dalë duke dhënë disa opsione që janë dhe pa logjikë.
“I kam përcjellë por s’kam kuptuar asgjë, për shkak se politikëbërja nuk bëhet kur hapet fushata. Një parti serioze bën fushatë 365 ditë, pra këta për 365 ditë kanë qenë të zhdukur dhe tani përnjëherë po na japin opsione të cilat nuk kanë shumë logjikë sepse të thuash që do ta bësh një projekt, si do ta bësh, cili është ndikimi, ka shumë gjëra të paqarta”, është shprehur Arifi.
Sipas tij, asnjëri nga kandidatët nuk e ka bindur në tri çështje lidhur me kryeqytetin.
“Këta kandidatë deri tani nuk më kanë bindur se si do ta mbajnë pastërtinë e qytetit, si do ta rregullojnë komunikacionin dhe si do të kujdesen për fëmijët. Është më shumë një riciklim i politikave, nuk ka analizë serioze që do të ketë impakt në politikën e Prishtinës”, ka vlerësuar politologu për Gazeta Blic.
Sipas Arifit, në balotazh shkojnë Përparim Rama dhe Uran Ismaili.
“Në balotazh, për shkak të pushtetit që e ka mendoj se kryetari aktual, mendoj se do të jetë një garë e ngushtë mes Përparim Ramës dhe Uran Ismailit, por kjo mbetet për t’u parë, kemi kohë deri në tetor”, ka deklaruar Dritëro Arifi
