Një foshnje e porsalindur u gjet pranë një deponie mbeturinash në Prishtinë.
Foshnja raportohet se është braktisur duke u vendosur në një qese plastike.
Klankosova.tv mësoi se foshnja e gjetur është pa shenja jete, kjo u konfirmua edhe nga Prokuroria Themelore në Prishtinë, e cila bëri me dije se po marrin veprimet e nevojshme për ta zbardhur rastin.
“Ju njoftojme se Prokurori kujdestar eshte njoftuar per rastin aktual, eshte ne ndermarrjen te gjitha masave dhe veprimeve hetimore per kete çeshtje”, ishte deklarimi i Prokurorisë.
Njëherësh lidhur me rastin është deklaruar edhe Policia, përmes zëdhënësit rajonal të Prishtinës, Agron Borovci.
Borovci tha për Klankosova.tv se bashkë me Prokurorin e Shtetit me seriozitet po e hetojnë rastin.
“Ftojmë këdo që ka informacion lidhur me ngjarjen të kontaktojë direkt Policinë”, deklaroi Borovci për Klankosova.tv.
Në ndërkohë ende nuk dihet se kush fshihet pas këtij akti çnjerëzor.
Klankosova.tv, do të ju mbaj të informuar me çdo detaj në lidhje me rastin.
