Dy punëtorë kanë humbur jetën sot në vendin e punës në Gjakovë, teksa ishin duke punuar në lartësi.
Prokuroria Themelore në Gjakovë ka njoftuar se dy persona janë ndaluar për 48 orë pasi dy punëtorë kanë humbur jetën pasi dyshohen se kanë rënë nga lartësia e një objekti ku po punonin.
“Me vendim të Prokurorit të Shtetit, trupat e pajetë janë dërguar për obduksion në Institutin e Mjekësisë Ligjore (IML). Po ashtu, me vendim të Prokurorit të Shtetit, janë ndaluar dy (2) persona, në kohëzgjatje prej 48 orësh lidhur me këtë rast, për shkak të veprës penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”, njofton Prokuroria.
Bëhet e ditur se brenda afatit të paraparë ligjor, ndaj të njëjtëve do të paraqitet kërkesa për caktimin e masës së paraburgimit.
Mediat kanë raportuar se personat e arrestuar janë biznesmeni Xheladin Pozhegu dhe inxhinieri Albert Margegaj.
