Policia e Kosovës ka arrestuar një person të dyshuar për veprën penale “keqpërdorim dhe mashtrim në prokurim publik”. Arrestimi është bërë nga Njësia Rajonale për Hetimin e Krimeve Ekonomike dhe Korrupsionit në Gjilan, pas sigurimit të provave gjatë zhvillimit të hetimeve.
Sipas Policisë, i dyshuari, si person i autorizuar në një procedurë prokurimi, ka paraqitur dokumente me përmbajtje të rreme me qëllim për të ndikuar në vendimin e vlerësimit të tenderit dhe për të përfituar kundërligjshëm fonde publike në vlerë prej 400 mijë euro.
Burime të Veriu.info bëjnë të ditur se personi i arrestuar është Drilon Etemi, i cili në këtë tender të shpallur nga komuna e Gjilanit kishte përfaqësuar konzorciumin e operatorëve ekonomik “Fortesa” Sh.P.K., “AlbaProject” Sh.P.K. dhe N.P. “Auremont”.
Veriu.info ka kontaktuar me pronarin e “Fortesa” Sh.P.K., Bujar Kabashi, i cili është bartës i konzorciumit të operatorëve ekonomik në këtë tender, i cili pasi që ka thënë se do të dërgoj përgjigje me shkrim për pak minuta, deri në momentin e publikimit të këtij artikulli nuk e ka dërguar.
“Policia e Kosovës, respektivisht Njësia Rajonale për Hetimin e Krimeve Ekonomike dhe Korrupsionit në Gjilan (NJRHKEK-Gjilan), gjatë zhvillimit të hetimeve, ka siguruar prova të besueshme se i dyshuari mashkull kosovar si person i autorizuar, me rastin e aplikimit në një aktivitet të prokurimit, me qëllim të mashtrimit si dhe ndikimit në vendimin në procedurën e vlerësimit, ka paraqitur dokumente me përmbajtje të rreme apo të falsifikuara, për t’i plotësuar kërkesat, në mënyrë që të përfitojë kundërligjshëm në fonde publike sipas ofertës së çmimit nga shuma e përgjithshme e vlerës së parashikuar prej (katërqind mijë) 400,000,00 euro”, thuhet në njoftimin e PK-së.
I dyshuari është intervistuar këtë të hënë dhe me vendim të Prokurorit të Shtetit është dërguar në mbajtje për 48 orë.
Lajmi në zhvillim: Detajet e rastit se si dyshohet që ndodhi mashtrimi në këtë aktivitet të prokurimit publik, pas pak në www.veriu.info
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
