Dy persona të dyshuar për mundësim prostitucioni që ishin objekt i hetimeve të zhvilluara nga Njësia për Hetimin e Trafikimit me Qenie Njerëzore, u arrestuan të hënën në Gjilan, nën dyshimin se kanë kryer këtë vepër penale në bashkëkryerje. Shtetasja serbe Nadikana Gudinci dhe 28-vjeçari kosovar, Etrit Jashari u ndaluan për 48 orë, derisa ndaj këtij të fundit u kërkuar caktimi i masës së sigurisë.
Nga Prokuroria bënë të ditur për Sinjalin se ndaj Jasharit është kërkuar masa e paraburgimit.
“Ju njoftojë se lidhur me rastin në fjalë, Prokurori I Shtetit, ka kërkuar caktimin e masës së paraburgimit për të pandehurin E.J, për shkak të veprës “Mundësim apo detyrim në prostitucion” nga neni 234 paragraf 1 të KPRK-së. Kërkesa për caktimin e masës së paraburgimit është dorëzuar në Gjykatën Themelore për procedim të mëtejmë”, thuhet në përgjigjen e Prokurorisë.
Kjo kërkesë është aprovuar dhe me vendim të Gjykatës, i dyshuari është dërguar në paraburgim për një muaj.
Lajmin e ka konfirmuar zëdhënësi i Gjykatës Themelore në Gjilan, Sabit Shkodra.
“Gjyqtari i procedurës paraprake, ka aprovuar kërkesën e Prokurorisë Themelore në Gjilan, duke i caktuar masën e paraburgimit të pandehurit në kohëzgjatje prej 1 muaji.”
Ndryshe, Sinjali ka raportuar se Jashari bashkë me shtetasen e Serbisë dyshohen se kanë kryer këtë vepër në motelin “Dardania” në Gjilan për një periudhë të caktuar.
Në anën tjetër, në lidhje me shtetasen e Serbisë, pritet të njoftohen autoritetet serbe për arrestimin e saj, përmes bashkëpunimit me ILECU.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata
