Kryetari i komunës së Mitrovicës ka pezulluar përkohësisht rregulloren për fillimin dhe mbarimin e orarit të punës që përcaktonte që dita e diel të jetë ditë pushimi, raporton Gazeta Online Veriu.info.
Pra dita e diel tash e tutje do të jetë ditë pune.
Deri tek ky vendim ka ardhur siç ka thënë komuna pas diskutimeve të shumta dhe kërkesave të bizneseve.
Njoftimi i plotë:
Njoftim
Dita e diele do të jetë ditë pune sipas orarit të rregullt
Duke u bazuar në diskutimet e shumta dhe kërkesat e bizneseve në takimet me përfaqësuesit e komunës, është bërë pezullimi i përkohshëm i dispozitave të Rregullores nr. 07/2023 dhe nr. 09/2023 për fillimin dhe mbarimin e orarit të punës së veprimtarive afariste dhe veprimtarive tjera në Komunën e Mitrovicës së Jugut.
Bazuar në nevojën për të siguruar një ambient më fleksibël dhe mbështetje për bizneset tona, të cilat kontribuojnë në rritjen ekonomike dhe punësimin, me vendim të kryetarit është bërë pezulimi i përkohshëm i dispozitave të Rregullores, ku dita e dielë do të jetë ditë pune sipas orarit të rregullt të ditëve të punës.
