Dje ka dështuar për herë të 45-të konstituohet Kuvendi i Kosovës.
Lëvizja Vetëvendosje si partia e cila ka dalë e para në zgjedhjet e 9 shkurtit vazhdon të insistojë në kandidaturën e Albulena Haxhiut, kandidaturë e cila nuk po përkrahet nga partitë opozitare.
Megjithëse Gjykata Kushtetuese mori vendim që Kuvendi të konstituohet brenda 30 ditësh, ky vendim deri tani nuk po zbatohet.
Në lidhje me situatën e krijuar në Kuvend ka folur për “Gazeta Blic”, ish-deputeti dhe zyrtari i lartë i AAK-së, Pal Lekaj.
Lekaj tha se në këto momente jemi më afër zgjedhjeve të reja sesa zgjidhjes së ngërçit në Kuvend për shkak të paaftësisë dhe arrogancës së Qeverisë.
Ai tha se Qeveria po vazhdon me kokëfortësi vetëm për interesa të veta politike.
“Të themi të drejtën, sot jemi më afër zgjedhjeve të reja sesa zgjidhjes së ngërçit në Kuvend, pikërisht për shkak të paaftësisë dhe arrogancës së kësaj Qeverie. Kryeministri ka humbur shumicën funksionale, Kuvendi është i paralizuar, qytetarët po vuajnë pasojat e mungesës së vendimmarrjes, ndërsa Qeveria vazhdon me kokëfortësi vetëm për interesa të veta politike” tha Lekaj.
Lekaj potencoi se qeveria aktuale në vend që të dialogojë dhe të kërkojë zgjidhje për qytetarët, merret me propagandë dhe me fajësimin e të tjerëve.
Ai tha se nëse LVV-ja nuk i ka numrat dhe s’ka guxim të marrë vendime zgjidhja më e ndershme është të shkohet në zgjedhje.
“Në vend që të dialogojë dhe të kërkojë zgjidhje për qytetarët, kjo qeveri po merret me propagandë dhe me fajësimin e të tjerëve. Prandaj, nëse LVV nuk ka numrat dhe nuk ka guximin të marrë vendime, zgjidhja më e ndershme është të kthehemi te qytetari dhe të shkojmë në zgjedhje të reja, që vendi të ketë një shumicë stabile dhe një qeveri që e udhëheq Kosovën me përgjegjësi, jo me inate personale” tha Lekaj në përgjigjen e dhënë.
