Kryetari i Nismës, Fatmir Limaj, është deklaruar për media pak para fillimit të seancës konstituive të Kuvendit, duke theksuar rëndësinë e arritjes së marrëveshjeve politike para procedurave të votimit.
Ai nënvizoi se për të siguruar funksionimin e institucioneve, duhet më parë të ndërtohet një marrëveshje politike që përcakton shumicën parlamentare.
“Siç kam thënë edhe herën e kaluar, konstituimi i Kuvendit dhe qeverisë – si në të kaluarën, ashtu edhe tani – vështirë se bëhet pa një marrëveshje politike të koalicionit që e përcakton dhe e vendosë shumicën parlamentare. Ajo shumicë zgjedhë kryetarin e Kuvendit dhe qeverinë, në përputhje me mandatin e dhënë nga qytetarët dhe sipas ligjeve e Kushtetutës.”
Limaj shtoi se është ende herët për të dhënë komente përfundimtare lidhur me zhvillimet në Kuvend, dhe se më shumë do të mund të thuhet pas përfundimit të seancës konstituive.
“Shpresoj dhe besoj që ato që tash e një kohë po i them të kuptohen: kjo është rruga se si ndërtohen institucionet, si në Kosovë, ashtu edhe në botë. Marrëveshjet politike duhet ndërtuar para se me u fut në Kuvend, e ajo shumicë pastaj udhëheq në ndërtimin e institucioneve. Po pres dhe po besoj se kjo shumë shpejt do të ndodhë, sepse kjo është në interes të Kosovës.”
