Lionel Messit nuk po i duket më asgjë interesante.
Pasi fitoi Botërorin, ylli argjentinas filloi të injorojë pjesëmarrjen në ceremoni të veçanta, edhe ato që i dedikohen posaçërisht atij.
E fundit ka qenë ceremonia e dekorimit të Messit me medalje presidenciale të lirisë, nga presidenti i SHBA-së, Joe Biden.
“Lionel Messi është lojtari më i dekoruar në historinë e futbollit profesionist. Ai mbështet programet shëndetësore dhe arsimore për fëmijët në mbarë botën përmes Fondacionit të tij Leo Messi dhe shërben si ambasador i vullnetit të mirë të UNICEF”, thuhej në deklaratën e Shtëpisë së Bardhë, në njoftimin e lëshuar lidhur me dekorimin e tij.
Megjithatë, ceremonia filloi dhe Messi s’u pa askund.
Pavarësisht se medalja është çmimi më i madh që Shtëpia e Bardhë mund të ndajë për dikë, Messi nuk mori pjesë në ceremoni.
