Lira turke ra sot në nivelin më të ulët në këmbim me dollarin dhe shënoi rënie për 5.6 për qind, pasi Banka Qendrore uli shkallën e interesit, në përputhje me programin ekonomik të Presidentit Rexhep Erdogan.
Pas këtij vendimi të Bankës Qendrore, vlera e lirës ra paraditen e sotme në 15.68 në krahasim me një dollar amerikan. Ndërsa në orët e pasdites lira ka pësuar një rritje të lehtë me 0.01, duke shkuar në 15.67 lira për një dollar amerikan.
Vlera e dollarit në këmbim me lirën është rritur më shumë se dyfish këtë vit. Banka Qendrore dha shenja se do ta ndërpresë ciklin e lehtësimit të shkallës së interesit për t’i vëzhguar efektet e tij në tre muajt e ardhshëm.
Vetëm në dy javët e fundit, Banka Qendrore ka ndërhyrë katër herë në tregun e valutave, duke shitur dollarë për ta ngadalësuar shitjen e lirës.
