Rafet Llapashtica nga Organizata e Veteranëve të UÇK ka dhënë detaje mbi organizimin e qytetarëve për protestën që do të mbahet më 14 shtator kundër Gjykatës Speciale në Hagë.
Sipas tij, i cili foli në emisionin “Kosova Today” në Klan Kosova, organizata ka përfunduar përgatitjet në 30 degë dhe nisja për në Hagë do të bëhet sot në orën 15:00 përmes linjave tokësore të autobusëve.
Disa pjesëmarrës do të udhëtojnë me avion ose me vetura private, ndërsa disa do të nisin udhëtimin më vonë.
Llapashtica theksoi se autobusët do të përdorin rrugën përmes Durrësit dhe linjën Bari në Itali, për të shmangur kalimet përmes Serbisë dhe Malit të Zi, ku mund të hasen pengesa gjatë udhëtimit.
“Ne si organizatë në 30 degë e kemi përfunduar organizimin dhe sot në ora 15 bëhet nisja përmes linjave tokësore të autobusëve, ndërsa ato ajrore ose me vetura private disa kanë lëvizur e disa do të lëvizin më vonë”.
“Ne kemi marrë qendrim që lëvizja e autobusëve të bëhet përmes Durrësit dhe linjës Bari të Italisë, duke mos e kaluar përmes Serbisë dhe Malit të Zi për shkak të mundësisë së pengesave”, tha Llapashtica.
