Deputeti i PDK-së, Mërgim Lushtaku, po ashtu kandidat për deputet në zgjedhjet e 9 shkurtit, ka reaguar ndaj kryeministrit Kurti, për deklaratën se “fetë erdhën e shkuan”.
Përmes një postimi në Facebook, ai ka thënë se është e kundërta e asaj që ka thënë Kurti, se partitë dhe liderët kanë ardhur e kanë ikur, ndërsa Islami ka mbetur një shtyllë e përhershme që i ka mbijetuar çdo sfide.
Lushtaku ka shtuar se “Kurti dhe ideologjia që ai përfaqëson do të jenë një faqe e përkohshme në librin e historisë sonë, ndërsa Islami do të vazhdojë të mbetet i rrënjosur në zemrat e njerëzve, si frymëzim për moralin, drejtësinë dhe qëndrueshmërinë e shoqërisë sonë.”
Postimi i tij i plotë:
Reagim politik ndaj deklaratës
“Fetë erdhën e shkuan”
Është pikërisht e kundërta e asaj që pretendon Albin Kurti. Në historinë e kombit tonë, sistemet politike, ideologjitë, partitë dhe liderët kanë ardhur dhe ikur.
Por Islami, si pjesë e pandashme e identitetit dhe kulturës së shumicës dërmuese të shqiptarëve (93%), ka mbetur një shtyllë e përhershme që i ka mbijetuar çdo sfide.
Edhe Kurti dhe ideologjia që ai përfaqëson do të jenë një faqe e përkohshme në librin e historisë sonë, ndërsa Islami do të vazhdojë të mbetet i rrënjosur në zemrat e njerëzve, si frymëzim për moralin, drejtësinë dhe qëndrueshmërinë e shoqërisë sonë.
Jam krenar që jam Shqiptar, krenar që jam Musliman, dhe krenar që jemi vëllezër me të krishterët, duke ndarë një tolerancë dhe respekt që shumë popuj e dëshirojnë. Ky është një virtyt që na bën unikë dhe na mban të bashkuar si komb!
