Zyrtarët e KQZ-së në asnjë mënyrë nuk po e pranojnë përgjegjësinë për skemën kriminale të manipulimit të votave për kandidatët në Prizren.
Ndonëse shoqëria civile nuk ka asnjë përgjegjësi shtetërore në organizimin, mbarëvajtjen e procesit zgjedhor dhe numërimin e votave, përfaqësuesit e VV-së dhe PDK-së në KQZ-së kanë drejtuar gishtin në drejtim të OJQ-ve.
Alban Krasniqi i VV-së dhe Arianit Elshani i PDK-së kanë gjetur “fajin” te shoqëria civile për vjedhjen e votave, ani pse manipulimi i votave të kandidatëve për deputetë është bërë nga komisionerët e partive politike.
Duket se ata kanë harruar se KQZ-ja si institucion nuk kanë marrë asnjë masë për të parandaluar keqpërdorimin e rezultateve në Qendrat Komunale të Numërimit pasi që asnjë vendvotim nuk është verifikuar gjatë kohës sa po ndodhte numërimi i votave të kandidatëve.
Gjatë debatit në emisionin “Kallxo Përnime”, ku u diskutuar tema “Vjelja e Votave”, kushtuar ngjarjeve të fundit ku në disa Qendra Komunale të Numërimit që janë përgjegjësi e Komisionit Qendror të Zgjedhjeve është zbuluar manipulimi i madh gjatë numërimit të votave të kandidatëve për deputetë.
Anëtari i PDK-së në KQZ, Arianit Elshani është ankuar se numri i vëzhguesve në Qendra Komunale të Numërimit ka qenë shumë i vogël gjatë kohës kur është bërë numërimi.
“Të kam pyet edhe ty, në raport me procesin e vëzhgimit, a kanë pasë vëzhgues në Qendra Komunale të Numërimit? Numri i vëzhguesve ka qenë shumë i vogël. Në shumë komuna s’ka pasë hiç në ato ditë kur është bërë numërimi në Qendra Komunale”, ka thënë Elshani, duke iu drejtuar monitoruesit të zgjedhjeve nga shoqëria civile, Eugen Cakollit, i cili përfaqeson KDI-në.
Më i ashpër dhe më i drejtpërdrejtë është treguar përfaqësuesi i Vetëvendosjes në KQZ, Alban Krasniqi.
Madje, ai ka përdorur gjuhë akuzuese ndaj shoqërisë civile.
“Ti je kanë në gjumë me krejt anëtarët e shoqërisë civile kur ne e kemi hetuar këtë”, ka thënë Krasniqi.
Ai i ka kërkuar Cakollit që të bëhet vetëkritikë.
“309 kanë qenë prej KDI-së. Keni mujtë me shku. Në aspektin e përgjegjësisë, si ti si vëzhgues, si vëzhguesi i subjektit politik, e ka njëfarë mënyre obligimin qytetarë me shku edhe me vëzhgu një proces. Kush të ka ndalë me vëzhgu? Derisa nuk të ka ndalë, banu pak edhe vetëkritikë, që nuk e ki sensin e aktivizmit qytetar me dalë me vëzhgu edhe me ndihmu një institucion edhe me parandalu këtë”, ka thënë Krasniqi.
Por, i menjëhershëm ka qenë reagimi i Cakollit.
“Ideja çka po thu ti është pse s’keni ardhë me na kqyrë qysh po vjedhim. Kjo nuk ka sens”, ka thënë Cakolli.
Në këtë debat është përfshirë gazetari, Kreshnik Gashi, i cili i ka quajtur të pandershme akuzat ndaj shoqërisë civile, derisa komisionerët janë paguar që të punojnë sipas ligjit.
“Është e pandershme me akuzu shoqërinë civile pse s’ka shku apo me i ba përgjegjës pse s’kanë shku me i monitoru zgjedhjet. Jemi tu e harru një sen, që na kemi pagu pare që këta komisionerët e partive, këta anëtarë të KKZ-ve me kry procesin qysh duhet. Dhe po lypin llogari prej do aktivistëve të shoqërisë civile, të cilët nuk e marrin asnjë cent buxhet prej shtetit”, ka thënë Gashi.
Pas debatit, ka reaguar prapë Cakolli nga KDI.
Në profilin e tij në “Facebook”, ai ka shkruar se KQZ-ja po refuzon të marrë përgjegjesi për rastin e manipulimit të votave.
“Paramendojeni… flasin për “gjumë” ata që paguhen ta mbrojnë votën dhe procesin, por flenë kur duhet të marrin përgjegjësi publike për manipulimet brenda subjekteve të tyre. ‘Pritjet’ që shoqëria civile ta bëjë punën që ata e kanë për detyrë kryesore, janë thjesht përpjekje për shfajësim”, ka shkruar Cakolli.
Numërimi në KQZ pa masa verifikimi
Gazeta Nacionale ka raportuar disa ditë më herët se nuk dihet nëse KQZ ka mbikëqyrur procesin e numërimit të votave të kandidatëve për deputetë dhe nëse janë zbatuar vetë rregullat zgjedhore të nxjerra nga ky institucion për numërimin e votave.
Nacionale ka mësuar se asnjë masë parandaluese nuk është marrë nga KQZ për të parandaluar keqpërdorimin e rezultateve në Qendra Komunale të Numërimit dhe rrjedhimisht asnjë vendvotim nuk është verifikuar gjatë kohës sa po ndodhte numërimi i votave të kandidatëve.
Anëtarët e KQZ-së kanë vendosur për rinumërimin e 914 vendvotimeve vetëm pasi që siç është thënë në njoftimin zyrtar të KQZ-së, Sekretariati i KQZ-së ka bërë shikimin e video-incizimeve të kamerave në vendosura në tavolinat e numërimit në Qendrat Komunale të Numërimit dhe është evidentuar se ka raste të mospërputhjeve të votave për kandidatë.
Nëse ky veprim, i paparaparë në rregulloren e KQZ-së, nuk do të ndodhte, me shumë gjasë nuk do të kuptohej asnjëherë për ndërhyrjet në evidentimin e rezultatit zgjedhor. Kjo do të mund të verifikohej, vetëm në rast se PZAP do të kërkonte rinumërim të këtyre vendvotimeve.
