Ka dështuar për të katërtën herë përpjekja për konstituim të Kuvendit të Kosovës.
Pas dy dështimeve për t’u zgjedhur kryetare e Kuvendit, kandidatja e propozuar nga VV, Albulena Haxhiu, ishte sërish emri i propozuar, por që nuk u hodh fare në votim dhe seanca u shtye për të mërkurën.
Deputeti i VV-së, Glauk Konujufca, tha se s’i kanë numrat dhe kërkoi kohë shtesë, teksa tha se duhet marrëveshje politike me partitë, që të votohet Haxhiu si kryekuvendare.
Partitë akuzuan njëra-tjetrën për bllokadë, teksa nuk dihet nëse të mërkurën do të jenë votat apo do të ndërrohet kandidatja.
Lidhur me gjithë këtë, analisti politik, Halil Matoshi, në një prononcim për Gazeta Blic, thotë se Kurti nuk dëshiron që t’i japë Kosovës institucione demokratike.
“Kjo dëshmon se Albin Kurti nuk po do t’i japë Kosovës institucione demokratike, duke mësy totalitarizmin”, tha Matoshi.
Ndryshe, seanca e radhës vazhdon të mërkurën në ora 10:00, ku do të jetë përpjekja e pestë për konstituim të Kuvendit.
