Jeta e Conor McGregor jashtë kafazit nuk ka qenë asnjëherë e lehtë e as e qetë.
Legjenda e arteve të përziera marciale është paditur nga një grua, me akuzën se i kishte bërë sulm seksual.
Gjithçka ka qit në dritë gjiganti britanik i mediave “The Guardian”, sipas të së cilit, britaniku akuzohet se këtë veprim e kishte bërë pas ndeshjes finale të NBA-së më 9 qershor të vitit 2023 në Miami të Shteteve të Bashkuara të Amerikës.
Padia është dorëzuar para dy ditësh në gjykatën e qarkut në Florida, ndërsa gruaja në fjalë pretendon se ishte sulmuar seksualisht në një tualet pas ndeshjes finale të NBA-së mes Miami Heat dhe Denver Nuggets.
Pjesë e padisë është edhe klubi i Miamit, si organizator i ndeshjes, por edhe palestra ku u luajt ndeshja, ndërsa në padi thuhet se yllit të MMA-së i ishte shërbyer alkool nga stafi i arenës, ndonëse ishte e dukshme se ai tashmë ishte i dehur.
Me këtë rast, McGregor akuzohet për sulm seksual, kurse “Kayesa Center” për neglizhencë dhe dështim për ta siguruar ambientin e sigurt.
Në bazë të padisë, “viktima” tha se një bashkëpunëtor e kishte dërguar atë me forcë në tualet tek sportisti irlandez, ndërsa më pas McGregor ishte munduar që me dhunë të kryente marrëdhënie seksuale me të.
Ky rast ishte raportuar në Policinë e Miamit po atë vit, më saktësisht dy ditë pasi kishte ndodhur, më 11 qershor 2023.
McGregor i ka mohuar akuzat, ndërsa në padi kërkohet një dëmshpërblim prej 75 mijë dollarësh.
Ai ishte treguar mjaft problematik pasi në të njëjtën natë, paraprakisht e kishte shkaktuar një tjetër incident duke e grushtuar maskotën e Miami Heat, të cilit i kishte shkaktuar edhe lëndime fizike.
McGregor ka shkaktuar gjithmonë probleme dhe është dënuar e gjobitur disa herë.
Përkundër sukseseve të jashtëzakonshme në MMS, McGregor është shembulli më i keq i një sportisti jashtë kafazit. /Gazeta Express
