Ministria e Drejtësisë ka dhënë një tender në vlerë 1.5 milion euro, me procedurë të negociuar pa publikim të njoftimit për kontratë, për përfaqësimin e Kosovës dhe Agjencisë Kosovare të Privatizimit në Arbitrazh.
Rastet për të cilat është dhënë ky tender janë ai mes “AgroKosova” dhe Qendra e Mobileve Italiane me AKP’në, si dhe ai i Suhareka Verari&Prorena me Republikën e Kosovës.
Me kontratë është shpërblyer firma ligjore me bazë në Austri “Zeiler Rechtsanwwlte GmbH”. Kompanitë tjera që ishin ftuar për negocim ishin edhe “Foley Hoag LLP”, me bazë në Boston, e cila kishte ofertuar 1.6 milion euro dhe “Squire Patton Boggs”, me bazë në Neë York, oferta e të cilës kishte qenë 2.4 milionë euro.
Si kriter për negocim ka qenë reputacioni i kompanisë në nivel ndërkombëtar, resurset njeësore dhe përvoja në përfaqësime të njëjta apo të ngjashme, efikasiteti në realizimin e shërbimeve dhe përshtatja sipas afateve të përcaktuara nga ana e Arbitrazhit, si dhe racionalizimi i shpenzimit të parasë publike.
“Ofruesi i shërbimeve është një firmë juridike/apo avokat, e regjistruar dhe e licencuar për të ofruar shërbime të përfaqësimit ligjor në Kosovë, një vend të BE-së ose në SHBA; Ka të punësuar të paktën tre ortakë ose avokatë, të cilët kanë përfaqësuar palët në arbitrazhin ndërkombëtar. Ka policë sigurimi, e cila e mbulon përgjegjësinë profesionale. Ka marrë pjesë apo ka udhëhequr ekipe në procedura arbitrazhi që rrjedhin nga marrëveshjet dypalëshe ose shumëpalëshe (Arbitrazhi për mosmarrëveshjet e investimeve, mosmarrëveshjet tregtare etj). Ka përfaqësuar në procedura të tilla një interes të një shteti, si palë e paditur apo paditës, në një procedurë arbitrazhi”, theksohet në dosje.
Në dosjen e tenderit, janë specifikuar detyrat e kësaj kompanie në këto raste, ashtu që të realizojë mbrojtjen më të mirë të interesave të AKP’së dhe Kosovës në kuadër të kërkesave për arbitrazh.
Një prej tyre është që kompania duhet mbajë të informuar AKP-në dhe Avokaturën Shtetërore për veprimet në procedurë, të raportojë rregullisht me shkrim për veprimet e ndërmarra një herë në muaj, apo raport të posaçëm nëse një gjë e tillë i kërkohet nga AKP-ja dhe Avokatura Shtetërore.
“Të dorëzojë të gjitha parashtresat, komunikimet dhe çfarëdo dokumenti-provë tjetër që kërkohet apo që shërben për interesa të mbrojtjes përgjatë procedurës së arbitrazhit brenda afateve të caktuara, të marrë pjesë dhe të përfaqësojë në të gjitha seancat e caktuara nga Tribunali, të përgatisë dëshmitarët dhe ekspertët e çështjes si dhe të ndërmarrë çfarëdo veprimi tjetër procedural apo material që ka për qëllim mbrojtjen e suksesshme dhe profesionale”, parashihet po ashtu me këtë kontratë.
Firma ligjore duhet të trajtoj me prioritet në çdo kohë kërkesat specifike të AKP-së dhe AVSH.
“Të sigurohet që personeli i angazhuar në përfaqësimin e të dy rasteve, do t’i kryejë të gjitha aktivitetet përkatëse me profesionalizëm dhe përkushtim maksimal, në përputhje me etiken profesionale dhe në respektim të rregullave, me qëllim të evitimit të pasojave procedurale dhe financiare për ATK dhe RKS; Të siguroj që të gjitha kapacitetet e nevojshme janë në dispozicion të mbrojtjes së interesave të AKP-së dhe RKS-së në rastin e arbitrazhit të iniciuar nga paditësi”, thuhet tutje në dosje.
Kontrata është dhënë dje, teksa nënshkrimi i saj është planifikuar të bëhet sot./Reporteri
