Gazetari Lirim Mehmetaj ka reaguar pas vendimit nga Inspektorati Qendror i Punës, që kryeinspektori Hekuran Nikçi ta dorzojë postin pasi që ky i fundit po e refuzon këtë vendim, transmeton Gazeta Online Veriu.info.
Mehmetaj ka thënë që Albin Kurti dhe Hekuran Murati kanë bërë shkelje duke mos i zbatuar procedurat ligjore të rekrutimit.
“Siç e dini, Gjykata Themelore, Gjykata e Apelit dhe Gjykata Supreme kanë konstatuar se Hekuran Nikçi është emëruar kryeinspektor kundërligjshëm, meqë Albin Kurti dhe Hekuran Murati në emërimin e tij kanë bërë shkelje duke mos i zbatuar procedurat ligjore të rekrutimit”, ka shkruar Mehmetaj.
Postimi i plotë:
Kështu s’keni pa – Kryeinspektori i shpallur kundërligjshëm nga të gjitha shkallët e drejtësisë në Kosovë refuzon të largohet nga vendi i punës
Me datën 26 dhjetor, dje pra, është marrë vendim nga Inspektorati Qendror i Punës, që kryeinspektori i këtij institucioni, Hekuran Nikçi, të largohet nga zyra, ta dorëzojë vulën zyrtare, dokumentacionin që posedon si dhe mjetet e punës në posedim, por ai po refuzon ta zbatojë vendimin.
Siç e dini, Gjykata Themelore, Gjykata e Apelit dhe Gjykata Supreme kanë konstatuar se Hekuran Nikçi është emëruar kryeinspektor kundërligjshëm, meqë Albin Kurti dhe Hekuran Murati në emërimin e tij kanë bërë shkelje duke mos i zbatuar procedurat ligjore të rekrutimit.
Tashmë ekziston vendim i formës së prerë që Kurti e Murati obligohen ta shkarkojnë nga vendi i punës, por nuk po ndodhë.
Tash, edhe vetë Inspektorati Qendror i Punës ka marrë vendim ta largojë Nikçin dhe kompetencat e udhëheqjes t’i kalojnë zëvendës-kryeinspektorit, derisa të rekrutohet kryeinspektori i ri përmes konkursit.
A po e kuptoni absurdin e padëgjuar në këtë situatë?
Është emëruar kundërligjshëm, e ka konstatuar secila shkallë e gjykatës edhe ky prapë dert nuk e ka, sepse nuk po e ka dert as Albin Kurti.
Thoshin “punë dhe drejtësi”. Qe drejtësia.
