Kryetari i Partisë Demokratike të Kosovës, Memli Krasniqi, ka reaguar pas ndërprerjes së seancës konstituive të Kuvendit, duke akuzuar kryesuesin Avni Dehari për veprim të njëanshëm politik në shërbim të Lëvizjes Vetëvendosje.
Krasniqi tha se pavarësisht se kishte kuorum në sallë, Dehari vendosi të ndërpresë seancën, gjë që sipas tij, përbën një keqpërdorim të pozitës së tij si deputeti më i vjetër në Kuvend.
“Sot është keqpërdor një e drejtë ligjore që i takon deputetit më të vjetër. Në kuptimin politik, është bërë një uzurpim i kësaj të drejte, dhe Kuvendi i Kosovës është shndërruar në një instancë partiake që i ka shërbyer VV-së dhe koalicionit të saj”, deklaroi Krasniqi në emisionin Pressing në T7.
Ai u shpreh se ndjen keqardhje personale për Avni Deharin, duke e quajtur të papranueshëm keqpërdorimin e një personi të moshuar për qëllime politike.
“Unë personalisht, në kuptimin njerëzor, ndjej keqardhje për Deharin. Është e pamoralshme dhe jonjerëzore me keqpërdor një njeri të shtyrë në moshë për një interes krejtësisht të vogël politik, për me u mshef pas një arsyetimi banal, kinse duhet konsensus,” u shpreh Krasniqi.
